కొండగట్టు అంజన్న చందనోత్సవం 2026: 60 ఏండ్ల తర్వాత నిజరూప దర్శనం – తేదీలు & రూట్ వివరాలు!
తెలుగు రాష్ట్రాల్లోని కోట్లాది మంది భక్తులకు ఇలవేల్పుగా వెలుగొందుతున్న కొండగట్టు శ్రీ ఆంజనేయ స్వామి ఆలయంలో ఒక అరుదైన చారిత్రక ఘట్టం ఆవిష్కృతం కాబోతోంది. స్వామివారికి అత్యంత పవిత్రమైన చందనోత్సవం జరిపేందుకు తెలంగాణ దేవాదాయ శాఖ సన్నాహాలు ముమ్మరం చేసింది. దశాబ్దాలుగా మూలవిరాట్‌పై పేరుకుపోయిన పాత చందనాన్ని సంప్రదాయ పద్ధతిలో తొలగించి, స్వామివారి అసలు నిజరూపాన్ని భక్తులకు కళ్లారా చూపించనున్నారు.
కొండగట్టు ఆంజనేయ స్వామి స్థల పురాణం!
కొండగట్టు అంజనేయ స్వామి ఆలయ ఆవిర్భావం వెనుక ఒక అద్భుతమైన స్థల పురాణం ఉంది. సుమారు మూడు వందల సంవత్సరాల క్రితం ముత్యంపేట గ్రామానికి చెందిన కృష్ణారావు అనే యాదవ బోయేడు తన ఆవుల మందను మేపడానికి ఈ గుట్టల ప్రాంతానికి వచ్చాడు. ఆ సమయంలో తన మందలోని ఒక ఆవు కనిపంచకుండా పోవడంతో, అతను తీవ్రంగా వెతికాడు. అలసిపోయి ఒక చెట్టు కింద నిద్రించిన అతనికి స్వామివారు స్వప్నంలో దర్శనమిచ్చి, తాను ఈ కొండల్లో వెలిశానని, ఆవు ఉన్న ప్రదేశాన్ని సూచించారు.కృష్ణారావు నిద్రలేచి చూసేసరికి ఆవు అక్కడ సురక్షితంగా ఉండటం, పక్కనే ఉన్న రాతిపై ఆంజనేయ స్వామి వారి శంఖు, చక్ర, అభయహస్త ముద్రలతో కూడిన స్వయంభూ స్వరూపం కనిపించడం జరిగింది. ఆ తర్వాత అక్కడ చిన్న ఆలయాన్ని నిర్మించి పూజలు ప్రారంభించారు. కొండపై గుహల మధ్య వెలిసిన స్వామివారు కాబట్టి ఈ క్షేత్రానికి "కొండగట్టు" అనే పేరు వచ్చింది.
క్షేత్ర మహాత్మ్యం & 41 రోజుల దీక్షల విశిష్టత!
కొండగట్టు అంజన్నను మనోళ్లు "ఆపదమొక్కుల అంజన్న" అని ఎంతో భక్తితో కొలుస్తారు. ఈ గుట్టకు ఉన్న పెద్ద ప్రత్యేకత ఏందంటే.. మనసుల శాంతి లేనోళ్లు, ఏండ్ల తరబడి తీరని అనారోగ్య బాధలతో సతమతమయ్యేటోళ్లు, గ్రహదోషాలతో ఇబ్బందులు పడేటోళ్లు ఇక్కడ కొద్దిరోజులు ఉండి స్వామివారిని నమ్ముకొని పూజిస్తే సమస్త బాధలు పటాపంచలైపోతాయని గట్టిగా నమ్ముతారు. తమ కోరికలు నెరవేరడానికైనా, రోగాలు తగ్గడానికైనా భక్తులు 41 రోజుల పాటు కఠినమైన నియమ నిష్టలతో "అంజనేయ స్వామి మాల" ధరించి మండలి దీక్ష పడతారు. ప్రతిరోజూ పొద్దున్నే ఆలయంలోని పవిత్రమైన కోనేట్లో మునకలేసి, తడి బట్టలతోనే అంజన్న గుడి చుట్టూ 11, 21 లేదా 108 ప్రదక్షిణలు చేయడం ఇక్కడి ప్రత్యేకమైన ఆచారం. గ్రహబాధలతో సగం అయ్యేటోళ్లు, వింత వ్యాధులతో బాధపడేటోళ్లు ఇక్కడ దినాలు ఉండి అంజన్న తీర్థ ప్రసాదాలు స్వీకరిస్తే రోగాలన్నీ నయమై పూర్తి ఉపశమనం దక్కుతుందని భక్తుల విశ్వాసం.
60 ఏండ్ల చరిత్ర మరియు అంజన్న నిజరూప విశిష్టత!
కొండగట్టు క్షేత్రంలో దశాబ్దాల తరబడి అర్చక స్వాములు ప్రతి శనివారం స్వామివారి మూలవిరాట్‌కు చందన లేపనం (గంధం పూయడం) చేస్తూ వచ్చారు. అలా ప్రతివారం నిరంతరం పూయడం వల్ల విగ్రహంపై చందనం మందపాటి పొరలా పేరుకుపోయింది. పాత చందనం దట్టంగా అలముకోవడంతో స్వామివారి అసలు స్వరూపంలో ఉండే సూక్ష్మ భాగాలు భక్తులకు స్పష్టంగా కనిపించేవి కావు.సరిగ్గా 60 సంవత్సరాల క్రితం (1960ల కాలంలో) ఈ చందనం పొరల్లో ఎలుకలు కలుగులు చేయడం, గంధపు పొరలు సందుల్లో రాలిపోవడం మొదలైంది. ఇది గమనించిన ధర్మపురికి చెందిన వేద పండితులు, ఆలయ అర్చకులు కలిసి తొలిసారిగా ఆగమశాస్త్రోక్తంగా చందనోత్సవం నిర్వహించి పాత గంధాన్ని పూర్తిగా తొలగించారు.అంతకుముందు వరకు అంజన్న అసలు నిజరూపం ఎలా ఉంటుందో ఎవరికీ సరిగ్గా తెలియదు. పాత చందనం తొలగించిన తర్వాత శంఖు, చక్రాలు మరియు హృదయంలో సీతారామచంద్ర స్వామి ప్రతిమతో ప్రసన్నవదనంతో ఉన్న అంజన్న దివ్య స్వరూపం ఆవిష్కృతమైంది. అప్పట్లో ఆ అసలు స్వరూపాన్ని ప్రముఖ చిత్రకారుడు అలిశెట్టి మహారాజ్ ఒక అద్భుతమైన చిత్రపటంగా మలిచారు. నేడు జగమంతటా ఇంటింటా పూజలందుకుంటున్న అంజన్న రూపాంతరం ఆ మహనీయుడు గీసిన చిత్రపటమే! మళ్లీ ఆరు దశాబ్దాల తర్వాత మూలవిరాట్‌పై చందనం దట్టంగా పేరుకుపోవడంతో చందనోత్సవం నిర్వహించాలని దేవాదాయ శాఖ నిర్ణయించింది.
ఉత్సవ ముఖ్య తేదీలు & దర్శన వివరాలు!
నవంబర్ 15 నుండి ప్రారంభమయ్యే ఈ పవిత్ర మహోత్సవాలు డిసెంబర్ 29 వరకు అత్యంత వైభవంగా సాగుతాయి. ఉత్సవాల క్రమం మరియు దర్శన వివరాలు ఇక్కడ చూడవచ్చు:
నవంబర్ 15 నుండి 20 వరకు (మహా సంప్రోక్షణ పూజలు):ఐదు రోజుల పాటు శాస్త్రోక్తంగా చందనోత్సవం, పాత చందనం తొలగింపు, ప్రత్యేక హోమాలు, జపాలు మరియు మహా సంప్రోక్షణ పూజలు జరుగుతాయి. ఈ ఐదు రోజుల్లో వాహన పూజలు మినహా మూలవిరాట్ దర్శనాలు మరియు అన్ని ఆర్జిత సేవలు పూర్తిగా నిలిపివేయబడతాయి. భక్తులకు దర్శన అసౌకర్యం కలగకుండా ప్రత్యేకంగా కొయ్యతో (కర్రతో) తయారు చేసిన ఉత్సవ మూర్తిని మండపంలో ప్రతిష్టించి దర్శన ఏర్పాట్లు చేస్తున్నారు.
నవంబర్ 21 నుండి డిసెంబర్ 29 వరకు (దివ్య నిజరూప దర్శనం):పాత చందనాన్ని శాస్త్రోక్తంగా తొలగించిన అనంతరం నవంబర్ 21 నుండి డిసెంబర్ 29 వరకు దాదాపు 40 రోజుల పాటు భక్తులకు స్వామివారి దివ్య నిజరూప దర్శనం కల్పిస్తారు. 60 ఏండ్ల తర్వాత వస్తున్న ఈ అరుదైన నిజరూపాన్ని చూడటానికి రెండు తెలుగు రాష్ట్రాల నుండి భక్తులు భారీగా తరలివచ్చే అవకాశం ఉంది.
డిసెంబర్ 29 (మండల పూజ & సింధూర లేపనం): డిసెంబర్ 29న అంజన్నకు అత్యంత వైభవంగా మండల పూజ ముగింపు వేడుకలు చేసి, స్వామివారి మూలవిరాట్‌కు నూతనంగా సింధూర లేపనం సమర్పిస్తారు.
ఆలయ దర్శన వేళలు & సర్వీసులు!
ఉత్సవాల సమయంలో భక్తుల రద్దీని దృష్టిలో ఉంచుకుని ఆలయ దర్శన వేళల్లో ప్రత్యేక ఏర్పాట్లు చేశారు:
ఉదయం సెషన్ (06:00 AM – 04:30 PM): భక్తుల క్యూలైన్ల ద్వారా సాధారణ దర్శనం కొనసాగుతుంది. రద్దీ ఎక్కువగా ఉంటే దర్శన సమయాన్ని మరింత పెంచే అవకాశం ఉంది.
విరామ సమయం (04:30 PM – 06:00 PM): ఆలయ శుద్ధి, మూలవిరాట్ కైంకర్యాలు మరియు ప్రత్యేక నివేదనల కోసం దర్శనాలు నిలిపివేయబడతాయి.
సాయంత్రం సెషన్ (06:00 PM – 08:00 PM): రాత్రి పూజలు, దివ్యాలంకార దర్శనం మరియు రాత్రి దర్శనాలు ఉంటాయి.
కొండగట్టుకు ప్రయాణ మార్గాలు & రవాణా సౌకర్యాలు!
కొండగట్టు అంజనేయ స్వామి క్షేత్రం తెలంగాణలోని జగిత్యాల జిల్లా, మల్లాపూర్ మండలం, ముత్యంపేట శివారులో గుట్టపై వెలసి ఉంది. వివిధ ప్రాంతాల నుండి చేరుకునే మార్గాలు:
హైదరాబాద్ : హైదరాబాద్ ➔ శామీర్‌పేట్ ➔ రాజీవ్ రహదారి (SH-1) ➔ సిద్దిపేట ➔ కరీంనగర్ ➔ మల్యాల ➔ కొండగట్టు (సుమారు 160 – 170 కిలోమీటర్లు, ప్రయాణ సమయం: 3.5 నుండి 4 గంటలు).
వరంగల్ / హనుమకొండ : వరంగల్ ➔ హుజూరాబాద్ / ఎల్కతుర్తి ➔ కరీంనగర్ ➔ మల్యాల ➔ కొండగట్టు (సుమారు 110 – 115 కిలోమీటర్లు). వరంగల్ బస్ స్టాండ్ నుండి కరీంనగర్‌కు ప్రతి 15-20 నిమిషాలకు ఆర్టీసీ బస్సులు అందుబాటులో ఉంటాయి.
ఆంధ్రప్రదేశ్ (AP) :విజయవాడ/అమరావతి నుండి సూర్యాపేట, జనగాం, సిద్దిపేట, కరీంనగర్ మీదుగా కొండగట్టు చేరుకోవచ్చు (సుమారు 330 కి.మీ).విశాఖపట్నం/ఉత్తరాంధ్ర నుండి కాజీపేట్ లేదా పెద్దపల్లి వరకు రైలులో వచ్చి, అక్కడి నుండి కరీంనగర్ మీదుగా రోడ్డు మార్గాన చేరుకోవచ్చు.
ఆర్టీసీ ప్రత్యేక బస్సులు: భక్తుల ప్రయాణ సౌకర్యార్థం తెలంగాణ ఆర్టీసీ (TSRTC) ప్రత్యేక బస్సులను నడుపుతోంది. ముఖ్యంగా వేములవాడ - జగిత్యాల మధ్య నడిచే 8 ప్రధాన బస్సులను కొండగట్టు గుట్ట మీదుగా దారి మళ్లించి సర్వీసులు అందిస్తున్నారు.
కొండగట్టు వసతి గదులు & టికెట్ల సమాచారం!
రూమ్‌ల లభ్యత: ఆలయ పరిసరాల్లో దేవస్థానం ఆధ్వర్యంలో సాధారణ గదులు (Normal Rooms), డీలక్స్ రూమ్స్ మరియు కాటేజీలు అందుబాటులో ఉన్నాయి. భక్తులు ఆలయ అధికారిక వెబ్‌సైట్ (kondagattutemple.org) ద్వారా ముందస్తుగా గదులు ఆన్‌లైన్‌లో బుక్ చేసుకోవచ్చు లేదా కొండగట్టు చేరుకున్నాక దేవస్థాన కౌంటర్ వద్ద నేరుగా సంప్రదించి పొందవచ్చు.
దర్శనం టికెట్లు: సాధారణ ఉచిత దర్శనం క్యూలైన్ల ద్వారా అందుబాటులో ఉంటుంది. ప్రత్యేక దర్శనాలు మరియు ఆర్జిత సేవల టికెట్లను ఆలయ ప్రాంగణంలోని కౌంటర్లలో పొందవచ్చు.
ఆలయ కాంటాక్ట్ నంబర్: వసతి లేదా దర్శన వివరాల కోసం ఆలయ అధికారుల సంప్రదింపుల ఫోన్ నంబర్: 08724-271239.
👉 జగిత్యాల జిల్లా అధికారిక వెబ్‌సైట్ – కొండగట్టు ఆలయం.
👉 తెలంగాణ దేవాదాయ శాఖ – కొండగట్టు ఆలయ సమాచారం.
కొండగట్టు చుట్టుపక్కల చూడదగిన పుణ్యక్షేత్రాలు!
కొండగట్టు దర్శనానికి వచ్చే భక్తులు సమీపంలో ఉన్న ఈ ప్రముఖ ఆధ్యాత్మిక మరియు పర్యాటక ప్రాంతాలను కూడా సందర్శించవచ్చు:
వేములవాడ రాజరాజేశ్వర స్వామి ఆలయం (సుమారు 40 కి.మీ): 'దక్షిణ కాశీ'గా పేరుగాంచిన శైవక్షేత్రం. ఇక్కడ రాజన్నను దర్శించుకుని కోడె మొక్కులు చెల్లించుకోవడం భక్తుల విశ్వాసం.
ధర్మపురి లక్ష్మీ నరసింహ స్వామి ఆలయం (సుమారు 35 కి.మీ): పుణ్యనది గోదావరి తీరాన ఉన్న ప్రసిద్ధ నారసింహ క్షేత్రం. ఇక్కడ యమధర్మరాజు దేవాలయం కూడా ఉండటం విశేషం.
ఎలగందల్ కోట (సుమారు 45 కి.మీ): కాకతీయులు, కుతుబ్‌షాహీలు మరియు నిజాంల నాటి చారిత్రక వైభవానికి ప్రతీకగా నిలిచే పురాతన కోట.
లోవర్ మనైర్ డ్యామ్ - LMD (సుమారు 40 కి.మీ): కరీంనగర్ నగర శివార్లలో ఉన్న భారీ జలాశయం మరియు పర్యాటక ప్రాంతం.
కోటిలింగాల (సుమారు 50 కి.మీ): శాతవాహనుల తొలి రాజధానిగా గుర్తింపు పొందిన చారిత్రక ప్రదేశం. గోదావరి మరియు మనైర్ నదుల సంగమ తీరంలో పురాతన శైవ ఆలయాలు ఉన్నాయి.
ముగింపు
అరుదుగా వచ్చే ఈ మహా ఘట్టం ముచ్చటగా ఆరు దశాబ్దాల తర్వాత మళ్లీ మనముందుకొచ్చింది. ఇన్ని దశాబ్దాల సందున అంజన్న నిజరూపం కళ్లారా చూసే అద్భుతమైన అదృష్టం ఇప్పుడు కోట్లాది మంది భక్తులందరికీ దక్కుతున్నది. నవంబర్ 21 నుంచి మొదలయ్యే ఈ నలభై రోజుల పవిత్ర నిజరూప దర్శనానికి భక్తులందరూ భారీగా తరలివెళ్లి, ఆ కొండగట్టు అంజన్న దివ్య ఆశీస్సులు అందుకోవాలని మనస్ఫూర్తిగా కోరుకుందాం. జై అంజన్న! జై శ్రీరామ్!
