కరెంట్ బిల్లుతో ట్రాఫిక్ చలాన్ల అనుసంధానం:సుప్రీంకోర్టు సంచలన సూచన!
అసలు సుప్రీంకోర్టు ఏమన్నది?
రోడ్డు భద్రత, ట్రాఫిక్ నిబంధనల అమలు మరియు ప్రమాద బాధితుల సంరక్షణకు సంబంధించి దాఖలైన పలు పిటిషన్లపై సుప్రీంకోర్టు ధర్మాసనం విచారణ చేపట్టింది. ఈ సందర్భంగా దేశవ్యాప్తంగా వివిధ రాష్ట్రాలు, కేంద్రపాలిత ప్రాంతాల్లో ఈ-చలాన్ల కింద దాదాపు రూ. 45,000 కోట్ల వరకు జరిమానాలు పెండింగ్‌లో ఉన్నట్లు కోర్టు దృష్టికి వచ్చింది. ఇందులో ఇప్పటివరకు కేవలం రూ. 25,000 కోట్లు మాత్రమే వసూలు కాగా, ఇంకా రూ. 20,000 కోట్లకు పైగా రావాల్సి ఉంది.దీనిపై స్పందించిన న్యాయస్థానం, కేవలం ఈ-చలాన్లు జారీ చేసుకుంటూ పోతే సరిపోదని, వాటి వసూళ్లపై కూడా గట్టి దృష్టి పెట్టాలని స్పష్టం చేసింది. జస్టిస్ జె.బి. పార్దివాలా నేతృత్వంలోని ధర్మాసనం వ్యాఖ్యానిస్తూ "ప్రజలు ట్రాఫిక్ చలాన్లను స్వచ్ఛందంగా చెల్లించకపోతే, ఆ బకాయిలను వారి కరెంటు బిల్లులకు జతచేయండి. వారు కరెంటు బిల్లు కట్టక తప్పదు కాబట్టి, ఆటోమేటిక్‌గా చలాన్ల మొత్తాన్ని కూడా చెల్లిస్తారు. లేదంటే వారి ఇళ్ల విద్యుత్ సరఫరా నిలిచిపోతుంది. ఈ దేశంలో బకాయిలు రాబట్టడానికి అధికారులు ఏదో ఒక మార్గాన్ని కనుగొనాల్సిందే" అని పేర్కొంది.
ఎందుకు ఈ కఠిన నిర్ణయాలు?
ప్రస్తుత డిజిటల్ యుగంలో సీసీ కెమెరాలు మరియు ఆటోమేటిక్ నంబర్ ప్లేట్ రీడర్ల ద్వారా పోలీసులు వేలాది చలానాలను క్షణాల్లో జారీ చేస్తున్నారు. కానీ, వాహనదారులు మాత్రం వాటిని పెద్దగా పట్టించుకోవడం లేదు. వాహనాలు అమ్ముకున్నా, లేదా పాత చిరునామాలు మారిపోయినా చలాన్లు అలాగే పెండింగ్‌లో ఉంటున్నాయి. ప్రభుత్వాలకు రావాల్సిన వేల కోట్ల ఆదాయం నిలిచిపోవడంతో పాటు, నిబంధనలను ఉల్లంఘించే వారిలో భయం కరవుతోందని కోర్టు అభిప్రాయపడింది. కేవలం నోటీసులు పంపడమే కాకుండా, క్షేత్రస్థాయిలో కఠినమైన అమలు చర్యలు ఉండాలని న్యాయస్థానం భావిస్తోంది.
సుప్రీంకోర్టు సూచించిన ఇతర ప్రత్యామ్నాయ మార్గాలు:
కరెంటు బిల్లులతో అనుసంధానం చేయడమే కాకుండా, పెండింగ్ చలాన్ల వసూలు కోసం సుప్రీంకోర్టు మరికొన్ని కఠినమైన చర్యలను కూడా ప్రతిపాదించింది:
1. పరివాహన్ పోర్టల్‌లో బ్లాక్‌లిస్ట్: పెండింగ్ చలాన్లు ఉన్న వాహనాలను ‘పరివాహన్’ (Parivahan) వెబ్‌సైట్‌లో బ్లాక్‌లిస్ట్ చేయడం.
2. యాజమాన్య బదిలీ నిలిపివేత: ఆ వాహనాల ఓనర్షిప్ ట్రాన్స్‌ఫర్ (Ownership Transfer), రిజిస్ట్రేషన్ సర్టిఫికేట్ల (RC) పునరుద్ధరణ వంటి సేవలను పూర్తిగా నిలిపివేయడం.
3. ఫిట్‌నెస్ మరియు పీయూసీ సర్టిఫికేట్ల నిరాకరణ: వాహనాలకు సంబంధించిన ఫిట్‌నెస్ సర్టిఫికేట్లు (FC), పొల్యూషన్ అండర్ కంట్రోల్ (PUC) సర్టిఫికేట్ల జారీని నిలిపివేయడం.
4. రోడ్లపై వాహనాల సీజ్: ట్రాఫిక్ పోలీసులు రోడ్లపై రాండమ్‌గా తనిఖీలు నిర్వహించి, పెండింగ్ చలాన్లు ఉన్న వాహనాలను గుర్తిస్తే క్షణం కూడా ఆలస్యం చేయకుండా అక్కడికక్కడే వాహనాలను సీజ్ (Impound) చేయాలని కోర్టు స్పష్టం చేసింది.
సామాన్యులపై దీని ప్రభావం ఎలా ఉంటుంది?
ఒకవేళ రాష్ట్ర ప్రభుత్వాలు మరియు విద్యుత్ శాఖలు సుప్రీంకోర్టు ఈ అనధికారిక/మౌఖిక సూచనలను అమలులోకి తెస్తే, వాహనదారులపై తీవ్ర ప్రభావం పడే అవకాశం ఉంది. ట్రాఫిక్ నిబంధనలను చిన్నచూపు చూసి చలాన్లు కట్టకుండా వదిలేసే రోజులు ఇక ఉండకపోవచ్చు. కరెంటు బిల్లుతో ట్రాఫిక్ జైరిమానా జతై వస్తే, కరెంట్ కట్ అవుతుందనే భయంతో ప్రతి ఒక్కరూ సకాలంలో జరిమానాలు చెల్లించక తప్పని పరిస్థితి ఏర్పడుతుంది.
ఈ విధానం అమల్లోకి వస్తే అద్దె ఇళ్లలో ఉండేవారు, ఒకరి పేరుపై రిజిస్టర్ అయి వేరేవారు నడుపుతున్న వాహనాల విషయంలో కొన్ని సాంకేతిక ఇబ్బందులు తలెత్తే అవకాశం ఉందనే చర్చ కూడా జరుగుతోంది. ఏది ఏమైనప్పటికీ, ట్రాఫిక్ ఉల్లంఘనలను అరికట్టడానికి మరియు ప్రభుత్వ బకాయిలను రాబట్టడానికి సుప్రీంకోర్టు చేసిన ఈ వ్యాఖ్యలు దేశవ్యాప్తంగా ప్రస్తుతం సంచలనంగా మారాయి.ఈ పోస్ట్ పైన మీ కామెంట్ ఏమిటి?
